سألت جدي .. طول عمرك ما تهاوشت انت وجدتي ؟ !!
جاوبني / اكذب عليك اذا قلت لك لا
ياترى أيش السبب !!
الشيبان طول الله عمرهم عالطاعة
كانوا يتزوجون واعمارهم من 15 إلى 17
والفترة هذي الإنسان صعب ينكر الجميل لو صار ما صار
وبرضوا ان الاباء كانوا يربون عيالهم على الحق وكلمة الصدق
وكانوا يعودونهم عالرجولة وكان كل شخص يبحث عن اسما معاني الرجولة
يعني ذابحتهم المراجل ..
كانوا يقولون اللي يطق المره مافيه خير .. > هذي نقطة في صالح المرأة
وايضا كانوا النساء يقولون اللي ما تلاعب زوجها مهيب مره ..> نقطة في صالح الرجل
هنا كفة الميزان متوازنة جدا عند الرجل والمرأة
من يوم يآخذه وعمره 15 طبعا الفترة هذي من 15 إلى 18 بالكثير
فترة تسمى في علم الاعصاب فترة العالمين أي يقصد الخيال والواقع
فالمراهق في سن الــ15 يكون عنده خيال رائع وحتى لو يحدث بخياله
لأبهر الجميع ..
لا حظو معي كيف استطاعوا اجدادنا انهم يخلو فترة زواجهم طول العمر
استطاعوا تحويل الخيال إلى واقع ..
آنا أقول لكم كيف !!
لو رجعنا اخي القارئ للوراء مدة من الزمن حول الـ15 أو الـ18
أغلب الشباب في المرحله هذي طاح على ثمه في يعني وقع في الحب
وانا ماني قايل لكم وش يتخيل في الفترة هذي لأنكم فاهمين وعارفين وش صار
فلما يظل الشاب بعد هذا الحب ويكبر ويصير بالــ20
ما عاد يهتم ويقول كنا جهال ما ندري !! وش الحب
أو يقول الله يا حب زمان ...
فبعد الــ20 لا يصبح للحب طعم أبداً
وان حصل فهو حب كاذب
......
هل لي بعقولكم يا آخوان برهة من الزمن >> فلسفة بلاغة
في فترة الــ15 إلى الــ18 إذا حبيت وخذيت اللي تحبه صدقني حبك باقي
لو يصير وش يصير ...
من كذا نستنج أن أجدادنا تزوجوا اللي يحبون فكبر معهم الحب يوم بعد يوم
سالفة لعمي حمد الحوطي الله يعطيه طولت العمر
توفت زوجته وعمرها 70 وحنا نصلي عليها كنت صغير وقتها
كنت اشوفه يبكي واسنغربت لأن كان في معتقدي ومفهومي اللي تربيت عليه
أن الرجال ما يبكي فما بالك بالشايب !!
مرة السنين وظل عمي إلى يومكم ما تزوج فسألته والسؤال كان سبب لتنزيل هذا الموضوع
قلت يعني بعد وفاة زوجتك مافكرة تتزوج >> شوفوا الجواب ياناس ياللي غيرتوا معنى الحب الحقيقي
رد بختصار .. قال تبيني أخونها وهي بقبرها >> أي شخص في العالم يقول كذا
قلت الموت خذها منك
قال وانا احتريه ياخذني لها
ياعالم شوفوا كيف الحب شوفوا كيف الوفاء والإخلاص وين المره تلقى مثل هذا الزوج
انا صراحة يوم قال لي كذا نزلت دموعي>قوووويه
لأن فعلا هذي التضحية هذا الوفاء ..
فكان حديثنا في المجلس عن الزوج والزوجة في الماضي
يعني على وقت شيبانا .. الله يعطيهم طولت العمر عالطاعة ويكونون لنا ذخر. آمين
فحكى لنا جدي سالفت جدتي يوم تزعل وقال لنا وشلون راضاها
تتوقعون وش زعلانه عليه
كانت تبي ( رش رش ) نوع من الحلي المصنوعه من الذهب
قال لها من وين اجيب لك قالت دبر عمرك
فاظطر انه يروح للرياض يكد ويدور له كم ريال يشتري لها رش رش
وترضى جدتي عليه وتنور بيتها
وتدور الأيام والليالي وتمضي السنين تلو السنين
وجا وقت العمار وكلن بنا له بيت
جا جدي بيبني بيت واخذ قرض وبنا البيت .
وجا البنك يطالب بقرضه وجدي معسر يعني ماعنده اللي يسد به القرض
وتقوم جدتي وتعطيه الرش رش وتقول بعه وسدد به دينك
وفعلا باعه وسدد به الدين .. وألحين يوم الله أغناه
شرا لها رش رش وزمام ذهب ..
يلوموني فيك يازمان آبائي واجدادي
يلوموني فيك يا زمان الفقر والطيبه والإحساس
يا ناس يا عالم يا هوه > كسرات
وش اللي يخلي الشيبان يحنون للماضي مع انه كان فقر وحسره
ولكن يحنون للماضي تدري ليه ؟
لأنهم يقولون
كان فقر لكن كانت فيه الرحمه
يعني الفقر اللي يعيب بس
كانوا على قلب واحد
الحاره كانت بيت كبير يلم أُسر
وكان عمدة الحارة هو الاب لهم وكانو أخوان كل واحد عضيد الثاني
الواحد فيهم لا طاح شالوه عشره ...
والحين اخوان مايدرون عن بعض !!
وش اقول وش اخلي آخ يازمن جدي !!
مع اجمل وأرق تحيه سطرتها لكم بأنامل ذهبية
أرجو ان تحوز على رضاكم واستحسانكم
كتب لكم هذا الموضوع الجميل
.
